分流

又講一個經歷比各位師兄分享, 記得讀書個陣時, 我地都好興去露營, 因有個同學係民安隊, 所以一年都會有三四次露營.

個年小弟中四, 應該係1988年吧, 我地班同學仔又去香港最西南的地方叫分流露營,(大嶼山西南面) 如果有師兄去過, 只有兩條路入去, 一係在石璧水堂行入去, 第二條就係大澳行入去.

個日我班同學先入去先, 因我有d事要夜晚先去,, 我就行大澳個邊入, 其實我都行過, 不過係日頭行, 今次就夜晚行. 記得個條路有條荒廢左個村,都幾陰森恐怖, 但係就會最快到分流...

咁小第差不多由6:00香港出發到大澳都8:30左右, 咁先吃d野再行啦, 個麵舖老闆問我去邊, 我話去分流個邊, 個老闆都話我好大膽, 夜麻麻一個人行都敢, 我話我係圍頭仔, 呢d環境習慣晒啦. 

不過老闆講, 你經過是荒廢村, 聽到有人叫你個名, 點都唔好向后望.. 我話我知, 我地圍頭仔都有細聽到大, 所以叫老闆放心.. (講真, 我地村d老人家個個有細灌輸呢d知識比我地, 所以都會好小心. 另外行d山路, 一定要將玉墜褂出來..)

咁差唔多9:30, 我就開始出發, 行過大澳之后就無乜屋, 近住就進入山路, 咁其實我點會唔驚呀, 一個人, 不過就將walkman有咁大聲整到咁大聲. 到差唔多一半就會進入個條村, 心諗要特別小心, 聽我地d老人家講, 一條村無啦啦唔會無人住, 經過要特別小心.. 

特然前面聽到d跑步聲給電筒擺來擺去, 我諗, 咁夜都人行呢條路出大懊? 當我見到原來有兩男個人, 佢地見到我都嚇一跳, 其中一個就話: 你行返轉頭啦, 前面唔對路呀, 頭先聽都有人叫我地個名, 我地就跑啦...我諗, 唔會咁猛褂...

咁就問返佢地, 你地原本去邊架, 佢地都話係去煎魚灣, 都係有事自己入去.... 咁我就話去分流, 如果行返出轉頭要成個鐘, 咁不如一齊行好唔好?

個兩個諗左一陣, 見我細過佢地都敢行, 佢地都行啦, 不過要我行前面. 咁我話好啦, 我都行過呢條路, 所以都識點行.

咁大家一齊行好過我一個人行啦, 到左個條荒廢村, 我地都特別留心有咩野啦...特然我聽到有人叫我個名, 我諗死啦, 唔會褂.. 我就無理繼續行啦, 我後面兩個友仔係到又驚又叫, 話今次死咁.. 心諗, 我頭先都同佢地講左, 聽到咩野聲都唔可理, 跟住我就得..

好彩, 我地平平安安過左條村, 我地心個都鬆一口氣, 係個山丘仔休息一下啦. 佢地話, 靚仔估唔到你都好大膽. 我話都係老一輩d人教. 咁就無事啦, 

咁我地都休息完, 都要出發, 咁佢地就話今次佢地行頭, 我行尾啦.. 我話無問題, 都就快到煎魚灣, 一陣我都要一個人行去分流. (煎魚灣到分流好快, 唔駛15分鐘路), 

咁行下啦, 我今次押尾, 所以就見到佢地背脊, 今次大鍋啦... 點解佢地隻腳掙唔點地既...唔係褂....
咁我都唔敢大叫啦...只有跟住佢地.. 我d汗係咁流, 雖然都係夏天, 但今次感覺到係冷汗呀....

咁跟住佢到煎魚灣, 佢地就講我到啦, 唔該晒你, 我話唔駛客氣, 咁我走先啦....(原來根本就得我一個人行)

好彩去到會合我d同學都咩事發生. 我都無講比我d同學知剛才d野. 到第二朝, 就問下到個邊d人 (分流係有人住, 不過出入都係坐船, 好少行路), 我話咁排又咩大事, 佢就話幾個月前有兩個人係煎魚灣露營游水浸死左).. 我諗會唔會頭先個兩位人兄呢?

到走個日, 我堅決行返出石璧, 雖然係耐d, 但係我唔想再見到啦..

后話, 經過呢一次, 我暑假一定唔會再去露營, (應該講農歷7月點都唔去露營)

作者：elfchan30