塔門露營深夜外面傳來操兵腳步聲
大約5 / 6年前，我跟朋友一齊到塔門露營，當時到塔門露營嘅人唔多！而我哋都係經常到塔門露營嘅，但個日非常深刻。
當日如常大概12點傾完計瞓覺，我好快就訓著咗，突然朋友叫醒我佢好驚，我問佢發生咩事？佢不停咁問：「你聽唔聽到出面有聲？你聽唔聽到出邊有聲？」但過咗一陣我都發現唔對路！
因為我聽到嘅係一群人嘅腳步聲，我睇吓手錶當時大概是凌晨三點，而我肯定瞓覺前觀察到附近都係得一兩個露營，無可能有咁多嘅腳步聲，最恐怖嘅係啲腳步聲越來越近。
嗰種腳步聲係勁似人哋嘅操兵聲，之後我哋互相對望唔敢出聲，我曾經諗過出去睇，但好驚見到唔知啲咩，後來腳步聲真係經過我哋嘅營，個心都震！亦都有諗過係咪牛？但由於實在太驚都係決定唔開出去睇，心入面不停講對唔住唔好意思。
最後腳步聲慢慢消失，到天光決定出去睇吓，但咩都見唔到，後來就瞓咗覺，再扎醒嘅時候已經係朝早八點，我哋去問隔離嘅營友問佢地聽唔聽到有操兵腳步聲，佢地話咩都聽唔到。
個次真係好驚，後來都聽過其他朋友去塔門露營時聽過操兵腳步的經歷。
來源：香港人露營分享谷友X小姐